पुणे : श्री. अनंत कुलकर्णी. (कार्यकारी संपादक )
राज्यातील देवस्थान इनामधारक शेतकऱ्यांच्या इनामी जमिनींचा प्रश्न ऐरणीवर आला आहे. राज्य सरकारने जून महिन्यात देवस्थान इनाम निर्मूलन कायदा २०२६ प्रस्तावित केला होता. या कायद्याबाबत इनामधारक शेतकऱ्यांच्या मनात मोठी साशंकता निर्माण झाली आहे.
या पार्श्वभूमीवर देवस्थान इनाम जमीन कृती समितीच्या वतीने रविवार, दि. २७ सप्टेंबर रोजी बोरमलनाथ देवस्थान, चौफुला, दौंड येथे इनामधारक शेतकऱ्यांच्या महामेळाव्याचे आयोजन करण्यात आले आहे.
या महामेळाव्याची माहिती आयोजन समितीतील परशुराम हिंदू सेवा संघाचे अध्यक्ष विश्वजीत देशपांडे यांनी पत्रकार परिषदेत दिली. यावेळी अखिल भारतीय गुरव समाज संघटना कार्याध्यक्ष शितल शिंदे, दशानाम गिरी गोसावी संघटना जिल्हाध्यक्ष नंदकुमार गोसावी आदी उपस्थित होते.
यावेळी विश्वजीत देशपांडे यांनी सांगितले की, महामेळाव्याला विधान परिषद सभापती राम शिंदे, खासदार मेधा कुलकर्णी तसेच आमदार राहुल कुल आदी उपस्थित राहणार आहेत.
देवस्थान इनाम वर्ग दोन व वर्ग तीनच्या जमिनी खासा करून वर्ग एक स्वरूपात इनामधारकांना देण्यात याव्यात, अशी प्रमुख मागणी या महामेळाव्यात मांडण्यात येणार आहे. त्यामुळे राज्यातील देवस्थान इनामधारक शेतकऱ्यांच्या प्रलंबित प्रश्नांवर या महामेळाव्यात सविस्तर चर्चा होण्याची शक्यता आहे.
